श्री राधा चालीसा ।। Shree Radha Chalisa ।।

श्री राधा चालीसा ।। Shree Radha Chalisa ।।

।।दोहा।।

श्रीगुरु चरण प्रताप ते, पायो विपिन को वास ।

वरनौ राधा चालीसा, रसिकन हिये प्रकाश ।।

चरण कमल हिये राखि के, जीवन होय अब धन्य ।

प्रिय सुयश नित गान करो, चरन सरोज अनन्य ।।

अहो कृपामयी लाड़ली, प्यारी परम उदार ।

वन विनोद सुखकारिणी, रसिकन प्राणाधार ।।

जीवन प्राण अब वन रहो, नवल प्रिय सुखधाम ।

व्रज वृन्दावन स्वामिनी, ललितादिक अभिराम ।।

____

व्रज में रावल सुन्दर ग्रामा । जहाँ प्रगटी प्रिय पूरण कामा ।। १ ।।

नित नव प्यारी रूप उजारी । जय जय जय बरसाने वारी ।। २ ।।

जय वृषभानु दुलारी राधे । प्रीतम प्यारी नित्य आराधे ।। ३ ।।

कीरति कन्या अति सुखदाई । श्रीदामा भैया मन भाई ।। ४ ।।

ललितादिक को प्राणन प्यारी । सब ब्रजवासिन की सुखकारी ।। ५ ।।

वृन्दावन रानी सुखधामा । नागरमणि प्यारी अभिरामा ।। ६ ।।

नित्य श्याम तोहे लाड़ लड़ावें । निरख नैन हिये प्राण सिरावें ।। ७ ।।

श्याम भावती व्रज की शोभा । देखत रसिकन के मन लोभा ।। ८ ।।

श्रीवृषभानु सुता अति भोरी । कोटि सुधा सिन्धु झकझोरी ।। ९ ।।

बरसानो निज धाम तिहारो । टहल महल करत जहाँ प्यारो ।। १० ।।

श्रीवृषभानु भवन जब आईं । नित नव मंगल होत बधाई ।। ११ ।।

विपिन राज कुंज्जन में डोलत । लता बेलि शुक राधा बोलत ।। १२ ।।

राधा राधा जो कोई गावत । सहजहि वे मोहन को भावत ।। १३ ।।

जो कोई राधा नाम सुनावे । श्याम वेगि ताहि अपनावे ।। १४ ।।

रसिक रसीली कुंज्जविहारिनी । प्रीतम प्यारी मोद बढ़ावनि ।। १५ ।।

गहवर कुंज्जन कुटी विराजत । प्रेम सरोवर सुख उपजावत ।। १६ ।।

लता बेलि शुक यमुना कूले । राधा राधा कह सब फूले ।। १७ ।।

सेवाकुंज नित रास रचावो । नागरमणि मन सुख उपजावो ।। १८ ।।

शयन सेज निज मुकुट सँवारे । ये सुख उर सों जात न टारे ।। १९ ।।

सब लोकन तुम यश विख्याता । प्रेम भक्ति निज मंगल दाता ।। २० ।।

श्रीवृन्दावन नवल नागरी । व्रज वनितन वन रही आगरी ।। २१ ।।

खेल खेलावत निज ललितादिक । फूले रहत रसिक वर नाइक ।। २२ ।।

लीला मूल स्वरूप धामिनी । आदिशक्ति निज श्रोत भामिनी ।। २३ ।।

नव नव प्यारी नवल सहेली । विहरत संग लिए अलबेली ।। २४ ।।

सब ब्रज की प्यारी ठकुरानी । वृन्दावन जिनकी रजधानी ।। २५ ।।

राज करे सब विधि सब काला । रसिक बिहारिणि भोरी बाला ।। २६ ।।

रवि तनया पिय ध्यान लगावे । राधा राधा कह सुख पावे ।। २७ ।।

सब विद्या सुप्रवीन लाड़िली । हित सजनी मुख देत चाड़िली ।। २८ ।।

ब्रह्म कोटि नूपुर अवतारा । शिव शारद पावत नहिं पारा ।। २९ ।।

नख दुति उपमा कैसे दीजै । कोटि शीश छिन-छिन ही भीजै ।। ३० ।।

रसिक रसीलो राधा देखत । अफ्नो जनम सुफल करि लेखत ।। ३१ ।।

श्रीवृन्दावन रस की सम्पति । राधारानी रसिकन दम्पति ।। ३२ ।।

कुंज्ज-निकुञ्जन जब-जब जाहीं । प्रीतम करें मुकुट परछाहीं ।। ३३ ।।

नवल किशोरी जहाँ चलि जावें । चरनन रज पिय नैन लगावें ।। ३४ ।।

मानत आपन भाग बड़ाई । तन मन में सब जड़ता आई ।। ३५ ।।

करुणामयी करुणा की खान । अपने जन सौं करें न मान ।। ३६ ।।

जो कोई शरण प्रिय की आवै । श्यामसुन्दर ताहि अपनावै ।। ३७ ।।

प्रिये बना लो अपनी दासी । चाहत नित ही महल ख़वासी ।। ३८ ।।

करो कृपा ना कीजै देरी । सखी लघु निज चरणन चेरी ।। ३९ ।।

सब विधि शरण तिहारी श्यामा । ‘हित गोपाल’ प्यारी सुखधामा ।। ४० ।।

 

।। दोहा ।।

नित उठ राधा चालीसा, पाठ करे मन लाय ।

नव-निकुंज निज महल की वेगि टहल मिल जाय ।।

रसिक रसीली भांवती, मंगल मूरति रूप ।

बसहु सदा सुख कुंज में, सुन्दर सुखद स्वरूप ।।

।। बाबा गोपालदस कृत श्रीराधा चालीसा सम्पूर्ण ।।